E lē taumate afai ae pasia ma faamamaluina, o se tala fiafia lea mo le to’atele a o se faamāmā avega i aiga ta’itasi pe a fua i le tulaga o loo iai nei le soifuaga.
O le asō ua folafola ai e le vaega faaupufai a le Green ina ia taofia mo le lua tausaga le toe totogiina o rent i le atunuu atoa se’i toe faataga ai tupe maua a tagata ia toe iai i se tulaga lelei ma ua manana’o foi le Green ina ia faia se faiga e faatapulaa ai se siitaga i fale mautotogi pe afai ae mae’a le 2 tausaga lea.
Saunoa le sooupu a le Green i mataupu tau fale mautotogi, o le taimi lenei ua matua’i lē mafai ona taofiofi le alu i luga o ia tau ma e faitau miliona tagata Ausetalia o loo feagai ma ia faigata i le taimi nei ma se’i vaganā ua faia iai se faatatau a le malo, e lē taumate o le a tele aiga e leai ni mea e nonofo ai ma o le a vaaia foi aiga e nonofo ia latou taavale.
I se tusitusiga a le 7News i le mataupu lea ua ta’ua ai i le 12 masina e oo mai ia iuni o le tausaga nei, e 9.1 pasene le siitaga na iai fale mautotogi i le tele o aai i le atunuu ae 10.8 pasene le siitaga i isi faaitu.
O loo valaau foi le Green ina ia faamuta loa se faia ua faaigoa i le faaperetania, no grounds evictions lea e lē tau tuuina ane ai e le landlord se mafuaaga tatau e aveesea mai ai ni tagata mautotogi mai lona fale.
O se lipoti talu ai nei i fale mautotogi i Ausetalia ua ta’ua ai ua taugata tele fale mautotogi ua taofia ai ma isi tagata mai le me’i atu i isi setete o loo maua ai avanoa faigaluega e sili atu ona lelei.
