Ua lipotia mai nei e silia ma le 100 tuna ua mamate po ua pepē tulou, i le vaitafe o Waiatai i le faaitū e lata ane lava o Wairoa.
O se matāupu ua faaalia ai le faanoanoa tele o tagata o lea faaitū, aemaise o le tula’i mai o lenei faafitauli i nei i’a ua maitauina ai le ono aafia o vaega o ālavai ua faaleagaina ma alia’e mai nisi o tulaga ma’ale’ale.
Faamauina i lipoti mai le leitio faavaomalo a Niu Sila, o loo ta’ua ai o nei tuna pe tusa lea ma le 40-50 tausaga le matutua, o se vaega ua faaalia ai le tāua ma le faasaoina o ola o nei i’a.
Faamatala e se tasi o faifaatoaga ma faifaiva, ia Darren Hill na amata lava ona ia maitauina e iai se faalētonu i le vai i le Aso Sa, ma ia vaaia ai tuna ua omai i luga ua fia maua se ‘ea.
O iinā na ia molimauina ai foi le suia o foliga vaaia o le vai, e pei ona līua mai le lanu ‘ena’ena malosi, ma ia sosogi ai se manogi faapei o le tiso.
E oo mai i le afiafi o le Aso Gafua ua vaaia le tele o tuna ua mamate i vaega uma o le vaitafe.
Ta’ua e le afafine o lea fai faatoaga, Kate Eaglesome, ua autausagā o faatino le galuega o le fafaga o nei i’a a o lea ua mamate.
O se vaega ua faaalia ai le faanoanoa tele o lea tama’ita’i.
Faamaonia e le laulauafono a le Hawke’s Bay, na faailoa atu lea matāupu ia i latou i le aso 12 o Ianuari, ma o lea ua faatino galuega iloilo i le māfua’aga o lenei matāupu.
Ta’ua e Darren Hill, i lona iloa e lata lava i le 10 kilomita le mamao ua aafia i lenei faafitauli ma e ono oo atu lava i le 5 tausaga o taumafai e toe oo i se lelei lenei vaitafae meaola ma i’a ua aafia nei.
E lē o mailoa le māfua’aga o lenei matāupu, ae o loo masalomia e tagatānuu o lea faaitū le faaleagaina o lea vaitafe, e lē o se vaega na tupu fua.
Puna o Faamatalaga: https://www.rnz.co.nz/news/ldr/584151/it-s-devastating-generations-old-eel-population-wiped-out-in-wairoa-stream
