O le taulealea talavou Samoa e 20 tausaga o le aulakapi liki a le Manly Sea Eagles i Ausetalia, sa tuuina i ni toleniga faigata tele sa lē talafeagai ma fetaui iai, a o lei faafuasei ona palasi ma fano ai lona ola.
O Keith Titmuss, sa vave ona matapogia i le mae’a ai o le 139 minute o le umi o toleniga, i le nofoaga autu a lea kalapu liki i le aso 23 o Novema 2020.
I le suesuega a le faamasinoga o maliu lilo, coronial inquest i le fano faafuasei o le ola Titmuss, sa faalogologo ai i faaiuga a suesuega a i latou tomai faapitoa na ta’ua ai, o lea tama talavou na safa i le vevela tele o le ea i le taimi sa palasi ai i totonu o le nofoaga e faia ai toleniga a le kalapu.
I le Aso Faraile talu ai, o le loia sa fesoasoani i le alii faapitoa e iloiloina maliu lilo, Adam Casselden SC, sa ia faaalia, o molimau o loo umia e le alii faamasino sa faailoa ai, na matuai mamafa tele ma faigata toleniga, e pei ona lipotia ai e le vaega o tala a le NRL news.
Sa ia logo ai i le Faamasinoga a New South Wales State Coroners Court, o ni toleniga mamafa ma faigata sa lē alagatatau ai, pe a tilotilo iai, o se toleniga umi muamua o le toe amataina o le taamilosaga.
Ae o se mea e ao ona malamalama i le toe tilotilo iai ina ua mae’a ona tupu mai le faalavelave, o se mea e lē alagatatau ai le maualuga tele o le mamafa o toleniga ma le lē saogalemu o le faatulagana ma le siomaga sa faia ai.
Sa tolaulau i le faamasinoga, o lea toleniga e silia ma le lua itula le umi, o ni toleniga sa faia i fafo ma totonu o le nofoaga i le faletoleni vevela ma le tapunipuni.
Na lipotia ai, o mātua o Titimuss ia Paul ma Lafo e pei ona matuai mafatia i le maliu o le la tama, sa iai faatasi ma le isi vaega o lana fanau i le taimi sa faailoa ai le faaiuga a le faamasinoga i le Aso Faraile.
