O le tumutumu ai o le hall a le Trust Arena i Henderson i le po o le Aso Faraile ma le po o le Aso Toonai i mātua ma aiga na maimoaina faafiafiaga a Le Masiofo Siva Academy, o le ata manino lea i le malosi o le lagolago a mātua i tapenaga a latou fanau o loo auai i totonu o lenei polokalame.
O se faamoemoe o loo mafai ona a’oa’oina ai le aganuu a Samoa ma lana gagana e ala i faafiafiaga eseese e pei o le sāsā, ma’ulu’ulu, siva Samoa, faataupati ma pese Samoa.
O le autu o le faamoemoe o lenei tausaga ‘E mamae le tava’e i ona fulu’.
Ma o le autu lenei sa tata’i uma iai lagona ma fatuga o pese ma faafiafiaga i lenei tausaga.
Ua fā ai nei tausaga talu ona faagasolo lenei polokalame.
Ma ua maitauina ai e faiaoga i alo ma fanau Samoa o loo gafa ma le a’oa’oina o nei faafiafiaga le telē o le suiga ua iai le aoga ma le tāua o lenei polokalame i fanau, ua lē gata i le gagana Samoa ae ua mafai ona latou faatinoina ni siva Samoa e fatufatu lava e faiaoga pese ma sisiva ai.
O fanau mai aoga eseese o loo auai i Le Masiofo Siva Academy, mai le 5 tausaga agai atu i luga i le 28 tausaga le matutua.
E toasefuluono faiaoga o loo gafa ma lenei polokalame, ae ua vaevaeina foi faiaoga i vaega eseese ua vaevaeina iai le matutua o fanau.
O fanau mai le 5 tausaga agai atu i le 8 tausaga le matutua, o le Vasega 1; o le 9 i le 13 tausaga le Vasega 2; o le 14 i le 18 tausaga le Vasega 3; ma le Vasega a le au matutua e amata mai le 19 agai atu i luga i le 28 tausaga.
