O le itula e 1 i le vaveao analeila na tulai mai ai se faalavelave tau taavale i Vaitele lea na uma ai le ola o se alii talavou ina ua so’a e le taavale o loo tau sailia nei.

Faamaonia mai e le Komesina o Leoleo Fuiavailiili Egon Keil i le Radio Samoa o loo faia suesuega a le Matagaluega faasaga I le mataupu .

Na ia taua e na’o le tasi le taavale lea ua agai iai le sailiga a leoleo o se Toyota pa’epa’e, e fā faitotoa, ae le’o manutinoa le Laisene, pau lea o le taavale e latalata ma le ituaiga o le taavale o loo masalomia I lenei faalavelave.

Saunoa Fui’availiili o se faalavelave lē ma’alofia ma e lagona le vaivai o le loto ona ua uma ai le ola o se tupulaga talavou

Ua fautuaina ai foi e le Komesina le mamalu o ave taavale i le atunuu ina ia ave le taavale ma le faautauta ma le mataala.

O lē ua maliu o se alii talavou, 19 tausaga le matua ma sa aoga I le Iunivesite Aoao o Samoa.