Ua faamaonia mai e le Komesina o Faalavelave Faafuasei ma Tineimu Tanuvasa Petone Mauga e toatasi se alii ua uma lona ola o se faalavelave tau taavale na tulai mai i Safaatoa Lefaga.
O lenei faalavelave na tali atu ai le Pulega o Faalavelave faafuasei i le itula e 4 i le afiafi o le Aso Lua 31 o Aukuso ma e ui i le faanatinati atu o i laua na aafia i lea faalavelave i le falemai mo togafitiga, e taunuu atu i le falemai faaitumalo i Leulumoega ua uma le ola o le isi ae o le tasi na iai manuaga tūgā na faanatinati atu i le falemai tele i Motootua.
Faaalia i ripoti o lea taavale o se loli ma na mafuli ma lavea i autafa o le auala. Taua e Tanuvasa na fesoasoani nisi o le mamalu o le atunuu na lata ane i le nofoaga na tulai mai ai le faalavelave e ala lea i le taumafai e fuli le taavale ma aumai i fafo i laua na iai totonu.
Taua e nisi na molimauina lea faalavelave o le saoosaoa tele o lea taavale na ala ai ona mafuli ma lavea ai loa.
O loo faatupulaia pea le tulai mai o faalavelave tau taavale i totonu o Samoa ma maumau ai soifua o tagata ae le gata i lea o fanau. Na fautuaina ai e le Komesina le mamalu lautele aemaise o ave taavale ina ia mataala, alu lemū le taavale mo le saogalemu o tagata uma.
