Ua maliu le tamaitai o Lisa Marie Presley, o le alo tamaitai o le alii pese tautaua, le King of Rock, o Elevisi poo Elvis Presley.
Lipotia mai le NZ Herald i le asō le faamaonia ai ua maliu Lisa Marie Presley ina ua oso faafuase’i lona fatu (cardiac arrest) i lona fale i Calabasas i Kalefonia.
O se faasilasilaga na faia e le tina o lenei tamaitai lauiloa, le tina ia Priscilla Presley na ia faalauiloa ai ma le faanoanoa le maliu faafuasei o si ana tama. “It is with a heavy heart that I must share the devastating news that my beautiful daughter Lisa Marie has left us. She was the most passionate, strong and loving woman I have ever known.”
O le taeao o le Aso Tofi i Kalefonia lea na lipotia le avatu faavave ai o le tamaitai o Lisa Marie i le falemai, ma sa faatino foi ni fesoasoani muamua ia te ia e le vaega o paramedics a o lei avatua i le falemai peitai o lea ua faamaonia mai lava ua siliga taumafaiga a fomai ma ua uma ai lava lona soifua.
O Lisa Marie Presley, e na o le ia lava le tama e toatasi a Elvis ma Priscilla Presley, ma na lei faigata i tagata uma e mulimulitai i pese a Elevisi ona latou matauina foliga tutusa ma aga uma a Elevisi sa aliali mai i lona afafine, aemaise foi sa mulimuli Lisa Marie i le taleni a lona tamā, e pei ona faalauiloa ai foi ana ia pese rock music i vaitausaga mai le 2000.
E toafa le fanau a Lisa Marie, e toatolu lana fanau teine ma lana tama tama e toatasi o Benjamin Keough na maliu ia Iulai 2020 ina ua pule i lona ola. O loo soifua mai pea lana fanau teine.
Sa faaipoipo atu Lisa Marie ia Danny Keough (1988 – 1994), King of Pop o Michael Jackson (1994 – 1996), Nicolas Cage (2002 – 2004), ma Michael Lockwood (2006 – 2016).
E maliu nei Lisa Marie Presley ua 54 tausaga o lona soifua, ma o se tala faanoanoa lenei mo le lalolagi o tagata e latou te viiviia pea ma pele i o latou agaga le soifua lauiloa o le tamā o lenei tamaitai, le King of Rock music, Elvis Presley
