Ua savali nei le lua tausaga talu ona tupu le faalavelave tau taavale na maliu ai se tamā 41 tausaga le matua, ae manu’a le tinā e 46 tausaga le matua o ia lea o le tuafafine o lē ua maliu, ma faamanu’alia foi se isi tagata i lea lava faalavelave tau taavale o se alii talavou 24 tausaga lona matua.

O Upuia Oloialii o se tane o Tufulele ma Lepa o ia sa aveina le taavale o le ituaiga o le Nissan Note sa aga’i faanatinati e ave i le falema’i i Leulumoega se tama na palasi ma matapogia ina ua mae’a ona matamata le taaloga a le Toa Samoa ma Egelani ia Novema o le tausaga e 2022.

Na aveina le taavale e Upuia ae leai se laisene ma na te le’i umia lava se laisene e faataga ai ona ia tago i le foeuli o se taavale.

O le aga’i i le falema’i i Leulumoega na saoasaoa le taavale ma mafua ai ona tifa i tua i se vaega o le ala taloto i le nuu o Tufulele ma maliu ai le tamā 41 tausaga le matua o le tuagane lea o le tinā o le to’alua o Upuia na faamanu’alia ai foi i le faalavelave.

O le faamaonia o le moliaga o le avetaavale faatamala ua maliu ai se tagata ma le moliaga o le avetaavale faatamala ua manunu’a ai ni tagata, ua nofosala ai i le falepuipui Upuia i le tausaga ma masina e 6.

Ua poloa’iina foi le faasā ona ia umia se laisene avetaavale mo le umi e 3 tausaga.