Na alafa’i mai Ausetalia i se tala faanoanoa i le aso ananafi ina ua faamaonia le maliu o se tasi o ana tagata iloga i le itu tau faafiafia ma musika aemaise foi se fesoasoani tele mo i latou e aafia i le gasegase o le kanesa.
O le tamaitai pese lauiloa a Ausetalia, Olivia Newton John ua silia ma le 30 tausaga o aafia i le kanesa ua faamaonia mai e si ona to’alua John Easterling i le Instagram.
Ua 73 tausaga o le soifua o Olivia ma ua faailoa i luga o faatalanoaga i le initaneti faapea upega tafailagi alofaaga ma faamaisega mai tagata eseese o le lalolagi mo si ona aiga.
E tele mea e manatua ai lea tamaitai i le lalolagi atoa e lē gata i lana taleni pese a o ata tifaga foi faapea ana galuega agalelei e ala i le nofoaga mo su’esu’ega mo kanesa ua faatūina i Melepone ma Amerika foi o loo fesoasoani ai i le to’atele ua aafia i lea gasegase.
E ese mai i tulaga na ia ausia i lana taleni o le musika, sa tuuina foi ia Olivia le faailoga taualoa o le Officer of the Order of British Empire i le 1979 ma le Officer of the Order of Australia i le 2006 ma le faaaloalo maualuga o le Companion of the Order of Australia i le 2019 ona o ana galuega lelei mo tagatanuu.
