O lea ua iu lava ina maliu le tasi alii o le toalua lea na faamanu’alia i pulufana i le Aso Tofi i Queen St i Aukilani.
O le misa lenei na tulai mai i le po o le Aso Tofi na mafua ai ona faamanu’alia tigaina alii toalua, ma o le Aso Toonai na faamautinoa mai ai e leoleo ua maliu le toatasi ma ua suesueina ai nei o se tasi na faaoo iai e se isi le oti.
O le lipoti foi i le Aso Toonai na faamautinoa mai ai e leoleo o le feeseeseaiga na tulai mai i le va o se tasi o kulupu, mulimuli ai se’i ane e le toatasi le fana ma faapāpā ma o lea na maua tonu ai le ulu o le tasi ae o le isi o le manava.
Ua fai mai ai ma leoleo o loo sue le alii 24 tausaga ia Darius Talagi o loo masalomia i le mataupu lenei, ma o ia foi lea sa toe alu ese mai i le scooter i le taimi na uma ai.
O lē ua maliu e faatoa sau i Niu Sila i le tausaga talu ai e nofo ai, mai Brisbane i Ausetalia.
