Faate’ia Ausetalia i le maua o le tala i le aso ananafi ua maliu se tasi o alii faia’oga i le lakapi liki ma o se tasi foi sa iloga i le taaloga a o talavou, Paul Green.  

Fai mai le lipoti na maliu i lona fale i Brisbane i le aso ananafi ae lē o faailoa le mafuaaga o le maliu ma o loo faatalia foi se isi lipoti ona ua ta’ua i le lipoti e lei gasegase le alii faia’oga aemaise sa vaaia foi i le faatasiga a le kalapu le Cronulla Sharks i le vaiaso talu ai.  

Sa faia’oga i le North Queensland Cowboys i le 2015 ma avea foi ma faia’oga mo Kuiniselani i le State of Origin i le 2021. Sa taalo i le Cronulla Sharks, Cowboys, Sydney Roosters, Paramatta Eels ma le Broncos ma avea foi ma sui o Kuiniselani ma Ausetalia. O le 49 o tausaga o lona soifua lea ua maliu ai.