Ua toe o ni nai aso ona atoa lea o le 2 masina talu ona tuumalo Pola’ivao Leati Sika Anoa’i ae o lea ua toe maua le tala faanoanoa ua maliu le tamā ia Gataivasā ‘Afa Amituana’i Anoa’i lona uso.  

O le faai’uga o le vaiaso talu ai na faamaonia mai ai e le aiga le tuumalo o lea tamalii.

O  tusitusiga i luga o upega tafailagi poo le facebook, na faailoa ai e le atalii o ‘Afa, Samu Anoa’i le maliu filemu ai o si o latou tamā, ma na iai uma lo latou aiga i le taimi na faamanavaina ai e le Atua galuega a lenei tamalii o le atunuu.

O Gataivasā ‘Afa Amituana’i Anoa’i ma lona uso ia Pola’ivao Leati Sika Anoa’i o tamafanau iloga o le atunuu na tausinio i le taaloga o le tauiviga poo le piiga i Amerika.

O Gataivasā ma Pola’ivao poo ‘Afa ma Sika sa ta’uta’ua i le taaloga o le piiga i le la ‘aupaga to’alua poo le tag team ua faaigoaina o le Wild Samoans e pei ona amata mai i le tausaga 1973.

E au tausagā o tumau pea le siamupini o le ‘au tag team a ia ‘auuso e pei ona faamauina e 21 taimi na siamupini i lo la taimi a o taaalo faapolofesa i lea foi fa’agatama.  

O le tausaga 2007 na amana’ia ai le sao o le alii o Gataivasā ‘Afa ma lona uso Pola’ivao Leati Sika Anoa’i i le lisi o tagata iloga ma taualoa i le WWE, le WWE Hall of Fame ona o le la sao i le taaloga ma le atina’e o lea foi ituaiga taaloga i totonu o le malo tele o Amerika.

Na faailo foi le loto faavauvau o le toatele faapea le faalapotopotoga o le taaloga o le WWE ona o le tuumalo ai o Gataivasā poo ‘Afa e iloa ai e le toatele i le la vaiaso talu ai.

I tusitusiga mai le Wrestling Observer o le tamā ia ‘Afa na tuu atu i le nofoaga poo le maota e tausia ma vaai ai tagata matutua poo le hospice care, ma e faalua na aafia le tamā matua i aafiaga o le ma’i fatu poo heart attacks, a o aafia ai foi i le gasegase o le limonia i le amataga o le tausaga.  

E maliu nei ‘Afa ua 81 tausaga le matua o lona soifua, na faaipoiopo atu i si ona faletua ia Lynn Anoa’i ma e to’afitu o la alo.