O le faaitu o Aukilani i Saute ma le komiuniti lautele o loo faaaautu iai le taumafaiga a se tasi o Asosi tele i Aukilani mo le faamoemoe ia unaia le faia o tui puipui o le faamai, koviti 19.
O le asosi o i latou sa aotauina ile Malisi, poo le Marist Brothers Old Pupils Association i Aukilani ua vaavaalua nei ma le South Seas Health Care Trust mo le faatinoina ole Vax a Nation drive thru campaign ua valaaulia ai tagata Maoli, Pasefika ma soo se tasi ina ia faia tui puipui.
I se pepa o faamatalaga tuuina mai le Asosi ua faailoa ai o le aso toonai nei 20 o Novema ua faatulaga ai lenei faamoemoe ile Taulaga faatau i Magele mai le 9 ile taeao ile 6 ile afiafi.
Ua faamoemoe o lea taumafaiga o le a faalauiloa atili ai le taua o le faia o tui puipui aemaise lava i e e lei faatinoina lava le tui muamua. O i latou e tai 12 tausaga ma sili atu o loo valaauina ina ia faaaoga tatau lenei avanoa mo le puipuia o soifua mai le faama’i.
Ua valaau ai foi le Asosi i ana paaga uma e le gata i tulaga tau taaloga ae faapea foi tupulaga talavou, aoaoga ma ekalesia ina ia galulue faatasi ai I lenei faamoemoe.
Faaalia e le Asosi ile pepa o faamatalaga e tumau pea lo latou lagolago ile malupuipuia o soifua o tagata mai le faamai ma e valaau ai foi i tama ma teine tuai uma o le Malisi ina ia auai faatasi i lea aso.
O taavale muamua e 200 e agai atu ile drive thru e pei ona faatulaga o le a mauaina pusa o taumafa ma ole a iai foi faailoga faapitoa ile aso atoa. O le faamoemoe o loo taimua ai leperesetene ole asosi i Aukilani, Lemalu Semo Sititi faapea le taitaifono o le Vax a Nation campaign, Tuala Ben Silva.
