Ua tua leaga fiafiaga ma tafaoga o le faamanatuina o le Halloween a Seoul i Korea i Saute.

E tuufaatasia tala fou ua silia ma le 150 tagata maliliu o Korea i Saute e mafua mai i le feomia’i na oo iai i le po o le Aso Toonai.

I lipoti a le BBC o loo faamatalaina ai le faatumulia o le taulaga i lea po lea e faapea e tusa ma le 100,000 tagata na o ane e faamanatu le uluai Halloween ua faia talu na uma le faamai.

I nisi o ata video o loo maua mai ai le toatele e lei mafai ona mānava, tagata o loo taumafai e tatoso faamalosi ese mai le magaala na matuai le mafai ona sao ai se isi.

O le toatele o i latou ua maliliu o tupulaga talavou, ma e oo mai i le taimi e tuufaatasia ai tala o le taeao o loo tausailia lava e nisi o matua a latou fanau a o nisi o loo le malolo i le o solo i falemai e saili o latou tagata.

I se saunoaga mai le Peresetene o lea malo, o lea ua faatalosagaina nei le iloilo o taiala tau saogalemu mo sauniga faapenei.

Ae i manatu o nisi taitai o le tele o malo, o lea ua momoli a latou faamaisega i tagata Korea i Saute ua aafia.