O le po anapo Aso 4 o Iulai 2021 na tuuina mai ai se poloaiga a le Ao Mamalu o le Malo afioga ia Tuimalealiifano Vaaleto’a Sualauvi II e atofaina ai le Aso 2 o Aukuso 2021 i le itula e 9:30 i le taeao ma aso e e tatala ai le Palemene lona 17 o Samoa i le maota fono i Mulinuu.
Na faia lenei poloaiga a le Ao o le Malo ma faailoa ai vaega i lona finagalo e le’i ausia lava i le sailiga ai o se faigamalo a Samoa. Taua e Tuimalealiifano “I le taimi nei e le’o mautu ma manino le aofai o sui usufono o le fono aoao faitulafono e aloaia faaletulafono ai le tauaofia o le Palemene lona 17”.
I lea poloaiga na taua ai e le Ao o le Malo “I le filifilia ai o sui usufono e 51, e 5 sui usufono tamaitai sa filifilia mai ma ua lē ausia ai le 10 pasene e pei ona aiaia ma moomia e le faavae”, lona 2 “o le nofoa faaopoopo mo tamaitai e tusa ai ma le mataupu 44(1A) o le faavae o Samoa e le’i aloaia lava i le taimi nei e ui lava ua maea ona faamaonia le faamasinoga talosaga poo le faamasinoga apili le tatau ona aofia ai o le sui usufono tamaitai faaopoopo e atoa iai le 6 o sui usufono tamaitai, o lona uiga o le aofai o sui usufono a le fono faitulafono ua aloaia nei e 52 ae le’o le 51”, lona tolu “afai ae tauaofia le fono aoao faitulafono e aunoa ma le auai ai o le sui usufono faaopoopo a tamaitai ua lē faamalieina ai aiaiga faa le faavae ma le aiā tatau faa le faavae mo sui usufono faaopoopo mo tamaitai”.
Taua foi e Tuimalealiifano “e leai se vaega faaupufai ua iai se vaega toatele o nofoa o le fono aoao faitulafono, ona o le lē mautinoa i le taimi nei o taunuuga o faamasinoga o mataupu tau faigapalota ma le taunuuga o faigapalota laiti e ono faatulai mai ua lē mautinoa ai foi i le taimi nei se vaega faaupufai e folasia ai le toatele o nofoa o sui usufono i totonu o le Palemene”.
Peitai e iai vaaega e feteena’i ai le malelega a le Ao o le Malo ma le faamasinoga e pei o le faaiuga a le faamasinoaga toeiloilo na tuuina mai i le Aso 25 o Iuni na faamanino ai e leai se mafuaaga o le a taofi ai fua le tauaofiaga a le palemene sei iai le sui tamaitai faaopoopo ae sei tālia le iuga o famasinoga o faigapalota ma palota laiti ona iloa lea pe iai se sui tamaitai faaopoopo ma o loo tulai pea le iuga i le FAST 26, HRPP 25.
Na toe faamanatu e le Ao o le Malo i le faamasinoga le malosiaga o loo ia umia e valaau ai le fono o le Palemene ma o faaiuga fai a le faamasinoga e pei o le faaiuga na faia i le Aso 28 o Iuni ina ia tauaofia le palemene i totonu o le 7 aso ua taua e Tuimalealiifano “ua faailia ai le faasiliaupule o le faamasinoga i le tofiga mamalu o le Ao o le Malo o Samoa”.
Na ia taua foi “I le faia o se poloaiga mo le Palemene ina ia tauaofia i le 7 aso mai le aso o lana faaiuga ua ta’u faatauvaaina ai e le faamasinoga le pule ma le malosiaga o le Ao o le Malo i lalo o le mataupu e 52 o le faavae o Samoa ona e na’o a’u (Tuimalealiifano) e iai le malosiaga faa le faavae e atofaina ai se aso ma se nofoaga e tauaofia ai le fono aoao o Samoa”.
O lenei poloaiga a le Ao o le Malo na ia taua o le a sui tulaga i se poloaiga na tuuina mai i le Aso 20 o Me 2021 na valaau ai le tauaofia o le Palemene lona 17 ina ia tauaofia i le Aso 24 o Me, o lena poloaiga ua faaleaogaina ona ia mavae le aso le alaoia ai.
