O le lagolago a le Malo e faalauiloa alo ma fanau a Samoa na soifua ma ola a’e i atunuu i fafo, ona o taleni ma taaloga ua fai ma avefu’a tāua mo Samoa i le lalolagi, o le lagolago lea a le pulega o tagata tafafao mai fafo i le afea o le atunuu e Justin ma Junior Tafa, o se auuso ua maualuga lo la tulaga i le taaloga fusupii poo le Kick Boxing lea ua la laasia le tulaga o le taaloga ua ta’ua o le UFC ma le MMA.

O le feiloaiga ma tusitala na o la faailoa ai le fiafia e tauave le igoa o Samoa ia la taaloga faavaomalo, ma e ui e faapea sa soifua a’e i Niu Sila ma siitia ai lo latou aiga ma faamautu i Brisbane i Ausetalia, ae le aveesea ai i o la loto le fia avea ma avefu’a a Samoa i soo se taimi e taaalo ai.

O le faamoemoe o i la’ua o loo malaga mai ma lo la tuaa tina, ia faaosofia ai ni lagona o tupulaga tama o le atunuu e fia aoao lea taaloga ma maua ai se avanoa lelei e selesele ai i ni faamanuiaga tau tupe pe a lelei ma manuia, e tua iai le lumanai aemaise o le atinae o aiga i Samoa.

Sa maua se avanoa e fesiligia ai lo la tuaa tina le afioga Pouli Amanda Foalefau Pita Tafa e tusa ai o le faamoemoe o le malaga mai i Samoa ma le silasila mamao i le aumai o se taaloga fusupii a ona alo e faia i Samoa.

Se faatalanoaga ma le afioga Pouli Amanda, o le tuaa tina o Justin ma Junior Tafa.