O le taitai o le Malo le afioga i le Tamaiti Palemia, Afioga Fiame Naomi Mataafa, o loo toesea ma le atunuu ona o le auai atu i le fono a le faalapotopotoga o taumafa a le lalolagi, le F.A.O. o loo usuia i le vaiaso nei i Roma le laumua o le atunuu o Italia.

O se fonotaga tāua e pei ona faailoa e lea faalapotopotoga tele a le lalolagi i upega tafailagi, ona o loo soalaupule ma talanoaina ai le tāua o le lava o taumafa, ma tapenaga a atunuu e faafetaui suiga o le tau.

O le tasi o vaega tāua o le fonotaga o le sao o atunuu taitasi e mafai ona foia ai le matelaina o se vaega toatele o tagata i le lalolagi, e mafua mai i taua ma vesiga, aemaise o fesuiaiga o le tau e fesootai i mala faalenatura e pei o lā mala, lologa ma tafega faapea afā fulifao.

O le tatalaina o lea faatasiga tele i le amataga o le vaiaso na faailoa ai e le Failautusi o Malo Aufaatasi o Antonio Guterres e selau atunuu ua mae’a ona tuuina atu a latou fuafuaga mo tapenaga i le lava o taumafa, ma o le tāua lea o le uluai fono poo se summit na usuia i le tausaga e 2021 lea na faataoto ai ni alāfua e limataitaiina ai atunuu ia latou fuafuaga mo le faateleina o taumafa.

O le Tamaiti Palemia o Samoa ua aofia i faauluuluga ma taitai o isi Malo e silia i le 20 o loo auai i lea fonotaga tāua.

O le faaiuga o le vaiaso ua faamoemoe e toe taliu mai ai i fanua le faigamalaga a le taitai o le Malo ma lana aumalaga.