O le alii lakapi numera 12 a le Wallabies mai Ausetalia na malaga faapitoa i le vaiaso ua mavae ma lona faletua faapea lo laua alo, e momoli le latou meaalofa e ala i togiga lakapi e lua mo le ‘au a le latou nuu o Gataivai. 

O le alii o Hunter Paisami o le alo o le tofa ia Tiatia Sale Paisami ma le tausi ia Sela Tiatia mai Gataivai. 

Na fofoa a’e le olaga o Hunter i totonu o Gataivai, ma o lona tama sa fiafia tele i lea foi taaloga o le lakapi. 

Ina ua malaga mai le aiga i Niu Sila ma sa faaauau ai aoga a le atalii ma ua vaaia ai e ono mātua e fiafia tele Hunter i le taaloga o le kirikiti ma le lakapi.

Peitai o le faasologa mai i taaloga ma aoga ma o le Kolisi o Magele na lilifa ai Hunter e fai le taaloga o le lakapi lea na iu ai lava ina piki mai e le kalapu a le Auckland Blues.  

Na malaga le aiga i Ausetalia ma toe faaauau ai le taalo a Hunter Paisami i le kalapu a le Rabels ma sa iu ai lava ina piki atu e le ‘au a le Reds lea o loo taalo ai i le taimi nei i le taamilosaga a le Super Rugby, ma filifili mai ai loa e le ‘au a Ausetalia le Wallbies. 

Na ta’ua e le tina ia Sela Tiatia, o le tele o taimi e talanoa atu ai Hunter ia laua mātua o loo momoli atu alofaaga o le aulakapi a Gataivai mo ia pe a oo i taimi o ana taaloga, ma o se fiafiaga sili lea mo ia ona o le tapuaiga a lona nuu ma lona aiga.

Sa lē galo ia Hunter lea tapuaiga ma mafaufau loa e fai sana meaalofa mo lona nuu ina ia faamalosia ai tupulaga o lona nuu pe a maua le togiga fou e taaalo ai.

Na tapena e Hunter Paisami togiga e aunoa ma le iloa e ona mātua, ae ina ua oo i le aso e malaga ai i Samoa, faatoa ta’u ai loa e Hunter i ono mātua le mafuagaa o le latou malaga ma lona toalua ma lona alo.  

O le feiloaiga a Hunter Paisami ma le nuu faapea le aulakapi a Gataivai na tuu aloaia atu ai loa a latou togiga fou e lua faatasi ai ma le seleni e fesoasoani ai i le atinaeina o le aulakapi.

Na momoli le agaga faafetai o tamā o le nuu o Gataivai i le latou tamafanau, ona o le manatu atu i le atinaeina o le lakapi i tupulaga o le nuu.