Ua faaiuina ma le manuia taaloga o le Olimipeka sa talimalo ai Tokyo Iapani ma ose Olimipeka tulaga ese foi aemaise ona ua faatinoina I se taimi o loo faaauau ai pea ona pepesi le faamai o le koviti 19 e le gata I totonu o Iapani ae faapea foi i isi vaega o le lalolagi.

O le po anapo na faataunuu ai le sauniga e tapunia aloaia ai lea faamoemoe mae o le tulaga na maualuga iai le silasila a le toatele o le finau a I latou sa filifilia e avea ma sui o atunuu taitasi i le Olimipeka, e lei avea foi tulaga ogaoga o le faamai ma nisi o luitau o le soifua e faavaivaia ai le finau a alii ma tamaitai na tausinio I lenei tausaga.

O le 2024 leisi tausaga e sosoo ai mo le Olimipeka ma ua fuafua e talimalo ai Paris i Farani lea ua pasi atu nei iai le sulu o le Olimipeka.

Mo Niu Sila lava ia ma lana au taalo na tulaga 13 I le faasologa o pine , 7 pine auro, 6 siliva ma 7 apa memea. Faafetaia e taitai o le atunuu ma le au tapuai le taumafaiga a le au taaalo ma faailoa ai e le minisita o taaloga Grant Robertson, e ave le faamalo I alii ma tamaitai taaalo ona e ui e lei iai nisi na mafai ona faataga i Iapani e tapuaia lo latou alofaiva peitai e lei faaitiitia ai le agaga tausinio mo se ai mo Niu Sila.