Ua mae’a le faamasinoga o tagi a le palota i le va o le sui a le HRPP Gatoloaifaana Amataga Alesana Gidlow ma le sui a le FAST ia Magele Sekati Fiaui lea ua faaleaogaina uma ai tuuaiga e 6 faasaga ia Magele ma faamaonia ai lona tulai mai o se sui o le Palemene o Samoa.
E le gata i lea e faaleaogaina foi tuuaiga e 5 na fai e Magele faasaga ia Gatoloai ma mautinoa ai le tulai mai o Magele ma sui faipule o le Itumalo Faasaleleaga No. 2.
O le susuga ia Magele o le Sui faipule aupito i laititi lea o faigaupufai i lenei tausaga lea e 35 tausaga o lona matua.
O le mataupu lea i le va o sui faipule o Faasaleleaga No.2 lea na molimau ai le alii o Fataloto Fealoa’i Fataloto faasaga ia Magele e faapea na tuu atu e le alii faipule le $50 tala ia te ia peitia ina ua fesilia e Loia i le lanu o le tupe na tali Fataloto na te lē manatua
O le isi mataupu na iloiloina i le aso o le fesiligia lea o le faatautoga na fai e sui faipule uma o le FAST i le Aso 24 o Me 2021 lea na fai i totonu o se faleie ina ua loka faitotoa o le maota fono.
O lea mataupu ua faamaonia mai o le Aso Gafua o le vaiaso fou Aso 28 o Iuni o le a iloa ai le iuga pe na talafeagai le faataunuuina pea o le faatautoga pe leai.
O le a faagasolo pea nisi o mataupu o tagi o le faigapalota i le vaiaso atoa.
