Na faafetaia e le Minisita o Tiute ma Tupe Maua le afioga i le Sui Palemia Tuala Tevaga Iosefo Ponifasio faafeagaiga sa auai i se fonotaga faapitoa i le mataupu tau lafoga a faifeau tausi nuu i le faaali tuu sa’o o o latou manatu i lea mataupu.
Na faaali le agaga faafetai o Tuala ina ua maea lana feiloaiga faatasi ma faauluuluga ma sui sinia o le au faigaluega a le Matagaluega ma sui o faafeagaiga tausi nuu a Ekalesia eseese na toe soalaupule ai le mataupu i lafoga a faifeau tausi nuu.
E iai nisi o Ekalesia e le’i auai o latou sui o faifeau tausi nuu i lea faatasiga na faia i le maota o tupulaga a le EFKS i Mulinuu. E le’i faatagaina ai Tusitala ma le au faasalalau i lea fonotaga na soalaupule ai lea mataupu ae o le saunoaga a le Minisita na ia faafetaia ai le valaau a Ekalesia i le finagalo a le Mālō e toe soalaupule le mataupu i lafoga ma saili tonu poo fea o iai finagalo a Ekalesia.
Na saunoa le Minisita ma ia ave le faamalo i faafeagaiga ona o manatu ua folasia atu ma o le a ia momoli i le palemia ma le Kapeneta e liuliu iai se tōfa ma se faautautaga. E pei ona silafia ua taofia lē tumau le totogiina o lafoga a faifeau tausi nuu i se faaiuga a le matagaluega ae toe iloilo ma saili se isi finagalo a Ekalesia.
O se tasi lea i manulauti ma taiala a le faigamalo fou a le vaega faaupufai a le Faatuatua i le Atua Samoa ua Tasi o le soloia lea o le tulafono o lafoga a faifeau ma faamuta ai le toe faaauauina i le tolu ai lea o tausaga talu ona amata faamamalu.
