Aso Gafua 26 Oketopa 2026

O le vaiaso ua mavae sa iai i Samoa le afioga Anae Arthur Anae ma lana au malaga o sui o le Pacific Justice, e lē gata sa malaga i Savai’i e feiloa’i i le mamalu o le atunu’u o faamautū ma nonfo ai, i le fa’alauiloaina o lana mau i ni suiga e ave i le malo o Niu Sila i le fa’agaioia o le nofomau ma visa malaga, ae sa āfea foi nisi o nu’u ma afio’aga i Upolu fa’apea ma le Iunivesite Aoao o Samoa.

Ua fa’ailoa i se pepa o fa’amatalaga le fa’afetai a le afioga Anae Arthur Anae ma sui o le latou savali i le ta’ita’i o le malo i le Palemia ma e uma sa latou mafuta ma fa’asoa i le latou talosaga e ala i le mau le petition o loo manaomia ai le sainigālima a o tatou tagata faapea tagata o le Pasefika.

Fa’aalia e lea tamāli’i o le atunu’u o le a fa’aauau pea le latou galuega fa’alauiloa ina ia mafai ona fa’amanino ai mafua’aga o le tāua i le malo o Niu Sila ona talia suiga ua talosagaina.

O loo fautuaina ai foi lo tatou atunu’u ma tagata o le Pasefika e saini o latou suafa i le talosaga o loo i upega tafailagi a le Pacific Justice, a’o le’i tu’uina atu i le malo o Niu Sila.

O le malosi o lenei taumafaiga e pei ona fa’ailoa e le Pacific Justice ina ua mae’a se feiloa’iga ma le Fono Faavae a Safata 2, e ta’oto i le galulue fa’atasi.

O saini ta’itasi, o leo ta’itasi, ma le lagolago a nu’u ta’itasi, e tāua tele i le una’ia o suiga lelei mo tupulaga o Samoa ma le pasefika o le lumana’i.