Ua mae’a le lua vaiaso sa faatautaia ai e sui mai le Matagaluega o Faigafaiva i Samoa ma sui mai le Ofisa o Faigafaiva a Amerika Samoa se aoaoaga ua ta’ua o le Solaupule lea sa faagasolo i le motu o fiafiaga.

O le faafetai e pei ona faaalia i tusitusiga i upega tafailagi mai le Matagaluega e tusa ai o polokalame o lenei aoaoga e faasoa ai nisi o itu o loo galulue ai auā le atinaeina o le vaega o faigafaiva i motu e lua.

E 6 nofoaga sa agai iai le asiasiga e aofia ai le vaega o loo iai faisua ma le faasopolia ai o nuu ma afioaga i le gataifale o loo faasao ai nei figota.

O lenei aoaoga o loo ogatasi lea ma le manulauti o le fonotaga a le Atoa o Samoa auā le galulue faatasi ai i atinae eseese.

O tomai ma agavaa o se itu faitaulia lea e pei ona faasoa ai e le ofisa mai Samoa i le faasaoina ai o nei figota ma le aoina o faamaumauga e faaaogāina ai nisi o metotia o loo vaavaalua ma le auaunaga a le Matagaluega o Faigafaiva.

O le faafetai foi e faailoa lea i le agalelei o le Konesula a Samoa i Amerika Samoa, Fata Brian Kaio ma le ofisa i le talileleia o le aumalaga a o feagai ai ma polokalame.

“Momoli foi le faafetai i le Afioga i le Konesula o Samoa i Amerika Samoa – Tofā Fata Brian Kaio ma le paia i le Ofisa e tusa o le talisapaia lelei o le malaga i ona vaega uma. Faafetai le loto Samoa! Faafetai le agalelei!

“Avea ia o lenei avanoa faaauro e momoli atu ai le faafetai tele i le Ofisa o le DMWR le Afioga i le Faatonu – Taotasi Archie Soliai Deputy Director – Selaina Vaitautolu ma le paia lasilasi o le aufaigaluega e tusa ai o le fitaituga ai lenei 2 vaiaso e galulue soosoo tau’au ma sui o le Vaega o Faigafaiva sa auai i Amerika Samoa.

“E talitonu o galuega uma ua o tatou faia ia viia ai le Atua ae ia manuia ai o tatou tagata. Faafetai le agalelei! Faafetai le alofa!

“O upu a le tusi, ‘A uma ona tatou faia o se mea, ona tatou faapea ane lea, o i tatou lava o auauna lē aogā.”