O le tau amataga o le masina o Fepuari o le tausaga fou 2026 ua faatulaga e aumai ai se faaiuga a le tamaitai faamasino sinia o le faamasinoga faaitumalo, le afioga Talasa Atoa Saaga, i moliaga o loo tuuaia ai lē sa avea ma faipule o le palemene afioga Fepuleai Faimata Su’a, o lē ua avea nei ma Palemia, susuga Laaulialemalietoa Leuatea Polataivao Fosi, faapea le ulugalii o Samuelu ma Sivai, o le tamaitai o Lise Schmidt ma lē sa avea ma leoleo o le malo le susuga Li’o Faataumalama Auava.
O le Aso Lua ma le Aso Lulu o le vaiaso nei sa tuuina atu ai folasaga ma finauga faai’u a le loia a leoleo, faapea loia e toatolu sa finauina le tali tete’e ai latou ua molia.
O moliaga o le taupulepule e nātia le mea moni, moliaga o le faiga faaso’esā e faaaoga ai fesootaiga faatekonolosi, faia o faamatalaga sesē ua lamatia ai le tauleleia o se tagata, ma le faaaoga o upu tau faifai i le faamoemoe e lepeti ai le filemu.
O le maliu o le tama aoga o Tuuau Faasavalu ma le su’esu’ega na faia e saili ai le tagata e ana le taavale na lavea ai lea taule’ale’a talavou ia Aperila o le tausaga e 2021, e aunoa ma se faatagaga mai lē sa avea ma Komesina o Leoleo, o le mafuaaga lea o moliaga sa suesueina ma ua tālia ai nei se faaiuga e iloa ai le faamaonia ma le lē faamaonia.
