O le aoauli nei (taimi Samoa) lea na fai ai finauga a loia o loo tulai mo itu e lua o lea mataupu o tagi o le faatosina o le palota i le va o le sui filifilia a Anoamaa No.2 o le sui foi a le HRPP le afioga ia Fonotoe Nuafesili Pierre Lauofo ma le sui tauva o loo tagi poo le sui o le FAST ia Toomata Norah Leota.
O lenei mataupu ua leva ona finauina i luma o le faamasinoga ma o le asō (19 o Iulai 2021) lea na tuuina atu ai finauga faai’u a vaega uma e lua.
O le finau a le itu a Toomata Norah tauala mai i ana loia le afioga ia Alex Su’a faatasi ai ma le lagolago a Fetu Lagaaia e faapea “o le roadshow a le FAST lea na faia i le Aso 13 o mati I le afioga o Solosolo o le aso tonu lea na faalauiloa ai le anavatau a le FAST ae le gata i lea o le finagalo a Toomata mo lona itumalo.”
Peitai o loo finau mai le itu a Fonotoe lea o loo tulai atu ai afioga i loia ia Tuatagaloa Shane Wulf ma Leinafo Taimalelagi e faapea “e solitulafono lea faalauiloa auā o le taimi tonu lea na faasa ai ni faatosina o le faigapalota.”
O le Aso Lulu 21 o Iulai lea ua tuuina mai ai e le faamasinoga maualuga e ala mai i afioga i faamasino ia Lesātele Rapi Vaai ma le afioga ia Fepuleai Ameperosa Roma o le a aumai ai se fa’aiuga o lea mataupu mo le itumalo a Anoamaa No.2
