I le tele o tausaga o faatino le galuega alofa a le faalapotopotoga o le Goshen Trust e ala i le vaaia ma le tausia o nisi o tupulaga talavou, o tina ma tamā o le atunuu e iai o latou aafiaga o le mafaufau, o lea ua tali talosaga a le faalapotopotoga na ave i le malo o Iapani, ma ua mae’a fausia ai se nofoaga fou i Vailima e faamautu ai togafitiga ma isi auaunaga a lea faalapotopotoga tuma’oti.
O le Malo o Samoa sa lagolago i le malo o Iapani e ala i le fanua ma le fale ua fausia ai se fale fogafalelua mo lea auaunaga fesoasoani.
E lata i le limaselau afe tālā na faatupe ai e Iapani le fausia o le fale, lea na umusa ma tatala aloa’ia mo le faaaogāina i le Aso Faraile na te’a nei.
E 16 potu o le fale, ma se vaega mo faatasiga aemaise ua iai foi ma isi potu e mana’omia e tagata e iai aafiaga o le mafaufau e vaaia ai i le nofoaga fou.
