O faalavelave faafuasei ma le matuia e lē mafai ona alofia ae peitai o le galulue faatasi e faatinoina gaioiga e puipuia mai ai ma tali atu ai i taimi o nei faalavelave, o le fu’a taualuga lea o le polokalame faagasolo a le Malo faatasi ai ma paaga o loo taulamua i le faafoeina o lenei vaega e tapenaina ai le mamalu o nuu ma afioaga i taimi o faalavelave.
Ua mae’a ona faatautaia lenei polokalame i le afioaga o Saipipi i Savaii i aso faatulagaina e faatino ai e agai lea i le nofo sauni o le afioaga i taimi e aliae mai ai se faalavelave e amata mai i le fuafuaina o lona faatinoina o nofoaga e saogalemu e agai iai, o le malamalama i faalavelave eseese faalenatura e ono aliae mai, o kulupu eseese ma a latou matafaioi faatasi ai ma le maitauina o Matagaluega ma faalapotopotoga e nafa ma nei vaega.
O Saipipi o le lona fā ai lea o afioaga mai afioaga e 20 o loo faagasolo ai le poloketi ua ta’ua o le Mau i le Too lea o loo faatupeina e le Malo tele o Amerika e tauala mai i le Pacific American Fund ma o loo faafoeina lea e le faalapotopotoga a le A.D.R.A. Samoa.
O nisi o Matagaluega o loo lagolago i lenei polokalame e aofia ai le Siosiomaga, Matagaluega o Leoleo, Pulega o Tineimu, Matagaluega a le Soifua Maloloina, Sosaiete a le Koluse Mumu, Samoa Family Health, Ofisa o Vaaitau ma le Faatāua le Ola, ina ia mautinoa le sologa lelei ma taunuu manuia lenei faamoemoe.
