O le mataina o le siva ailaoafi ma le siva Samoa a le Tausala o Samoa le tamaitai talavou o Moemoana Schwenke, o lana uluai aoaoga mo fanau laiti i le vaega o alii ma tamaitai na faatumulia ai le maota o Tupulaga Talavou a le EFKS i Mulinuu i le Aso Toonai na tea nei.
O nisi o le fanau ma o latou mātua na malaga mai Savaii ona o le fia a’oa’oina o le siva ailao afi o se siva a le atunuu, aemaise foi o le fia a’oina o le siva Samoa a tamaitai.
O se tasi lea o fuafuaga a le Tausala o le atunuu a o ia tauaveina le pale o le Tausala o Samoa, ia faasoa atu lona tomai i lea taleni mo alo ma fanau o le atunuu.
Ua iai foi lana fuafuaga e a’oina ai ma nisi o siva mai isi motu o le Pasefika.
