E silia ma le lua tausaga lea ua falepuipui ai se alii mai Aukilani e suafa ia Casey John Burt Smith e mafua mai i lona faaaogāina o se laisene avetaavale taufaasese ma isi IDs e 24 e maua ai tupe o totogi ona o le koviti.
Fai mai lipoti o le alii o Casey 29 tausaga mai Aukilani e faa 43 ona talosaga mo le wage subsidy ma peimeni mai le social welfare i le va o Aperila 2020 ma Aperila o le 2022.
O le lima o ia talosaga na faamanuiaina ma ia maua ai se vaegatupe e oo atu i le $26,946.80
Faailoa e se sooupu mai le matagaluega a le Social Development na faaaogā e le alii lea lona igoa ma igoa o nisi tagata i le faatinoina o lea solitulafono ma i le lauina o lona faasalaga na ta’ua ai e le faamasino o le fuafuaina lelei o lenei soligatulafono ua matuai solia ai le faatuatuaga aemaise o le tele o le vaegatupe na maua mai ai.
Sa ioeina e Casey moliaga e lua o le faaaogā o ni faamaumauga lē sa’o ma moliaga e tolu o le lē faamaoni i le faaaogāina o ni faamaumauga.
E 27 masina ma le 2 vaiaso le faasalaga i le falepuipui ma faatonu e toe totogi le $2000 e faasoa i ē na aafia i ana soligatulafono.
