Ua faamatala auiliili i se lipoti mai le alaata 9 a Ausetalia le laveaiina e se tamā na savavali ane ma si ona afafine agai i lo latou aiga ina ua tuua le aoga, se isi teineititi 11 tausaga semanu e ave faamalosi e se isi tagata.

Ua faailoa i le lipoti lea e faigata ona tomanatu pe o le ā se tulaga e oo iai sia teineititi pe ana taunuu le ave faamalosia e lea tagata.

Fai mai le lipoti o le teineititi na savali agai i lo latou fale i le aso 28 o Mati ma ui atu i Doncaster East ae agai ane se alii e lē masani ai i se taavale audi lanu efuefu.

Ua ta’ua i le lipoti sa ia fosi le teineititi e oso i totonu o lana taavale, o le fefe o le teineititi na momo’e ai ma lafi i se togavao lata ane peitai na toe liliu atu iai le taavale a le alii lea ma faatalitali le teineititi.

O le molimau a le tamā na fesoasoani i le teineititi, e agai atu ua matuai mafatia i le fefe ma lē mafai ona tautala, sa ia taumafai e faafilemu ma agai ai e saili lona aiga ae o loo fiu foi si ona tamā e fealuai solo i le taavale e saili.

O le taimi nei o loo suesue e leoleo le mataupu ma talosaga i nisi e silafia ni faamatalaga ina ia fesoasoani ane.

Ua faamatuu ane foi e leoleo ma se ata e faaaogā ai le komepiuta e tau faaata ai foliga o le tagata lea o loo sailia pea i le taimi nei.

Puna o Faamatalaga: https://www.9news.com.au/national/man-attempted-to-abduct-young-girl-in-melbourne/16a1241c-cb3a-4073-8179-0df38c2fe000