O le 48 itula ua mavae amata faitau mai i le 2 o le aoauli o le aso 22 o Me e oo mai i le 2 o le aoauli o le aso 24 o Me, na faamauina ai isi gasegase fou e 302 o le faama’i Koviti-19.

O le 301 o ia gasegase o tagata lautele ma le to’atasi o se tagata malaga mai fafo na taunuu i Samoa i le malaga faapitoa mai Niu Sila o le aso 22 o Me le Aso Sa na te’a nei.

Ua oo atu ai nei le aofaiga o tagata lautele ma pasese malaga ua aafia i le siama o le faama’i i le 13,145. E to’alima o loo taofia i le maota gasegase i Motootua mo togafitiga, ae leai ni gasegase o le Koviti-19 o taofia i potu tigaina.

E leai se soifua ua fano i le faama’i na faamauina i lea lua aso ma tumau ai pea i le 25 i latou ua maliliu i āuga o le faama’i. E iai nisi o maliu sa lesitalaina peitai ua lē faamaonia o ni auga o le koviti le mafuaaga.