O le mamao i uta o nofoaga e fai ai galuega a le pulega o le suavai pe a oo ina iai ni faaletonu i faatanoa vai ma nofoaga o iai ofe paipa tetele, o le a faafaigofie nei ona oo iai le aufaigaluega ona o le foa’i a le malo o Iapani e lima pikiapu landcruiser fou e aai uma pa’u e fā poo four by four wheel drive.

E taugatā ia taavale auā e silia i le ‘afa miliona le tau aofai poo le $587 afe tālā Samoa.

Ua faailoa e le amepasa o le malo o Iapani i Samoa i se pepa o faamatalaga, o le a faaaogā ia pikiapu landcruiser i galuega a le pulega o le suavai e tautua ai le atunuu atoa.

O le Minisita o Galuega Tetele ma Fela’ua’iga e aofia ai ma le pulega o le suavai na ia taliaina le foa’i a lea malo o se paaga totino a le malo o Samoa, auā o se lima taumatau i taimi o mafatiaga e pei ona sulufa’i foi iai nuu ma afioaga o le atunuu i ni fesoasoani e fausia ai galuega tetele e pei o falea’oga.

Talu ai nei foi na faamautū ai le fesoasoani a Iapani mo le nuu o A’ufaga o se vaegatupe e silia i le 300 afe tala e fausia ai se tane vai tele e teu iai le suavai mamā mo lea afioaga i le itu i Saute o le motu o Upolu.

Le Minisita o Galuega Tetele ma Fela’ua’iga e aofia ai ma le vaaia o le pulega o le suavai le Samoa Water Authority, i se vaega o lana saunoaga faafetai i le malo o Iapani.