O suiga i le vii o le fu’a o le tatou malo tuto’atasi, ua leva ona iai, ma sa faaaogā ma pepese ai le to’atele o loo latou manatua ma silafia lelei lea suiga.
Faaalia e le ta’ita’i o le Malo i se auala o faasalalauga i le gagana Samoa i Brisbane Ausetalia, o ni suiga e lē o aveesea ai le agaga, o Samoa e faavae i le Atua.
E pei ona silafia o le sauniga na tatala ai le fono a malo o le Taupulega sa mapuna mai ai ni faitioga ma salalau i luga o auala o fesoota’iga e pei o le api o foliga, ma tuua’ia ai le malo ma ē na tapenaina lea faamoemoe i le faia o ia suiga i le vii o le tatou fu’a na lagiina e le aufaipese tuufaatasi a kolisi faafaifeau i Piula ma Malua.
Faaalia e le tamaitai Palemia, Afioga Fiame Dr Naomi Mataafa i le polokalame o le Fetu Faasinoala i Brisbane, na soifua mai lava o faafofoga i suiga ia e lua o le usuina o le vii o le fu’a, lea e faapea mai se vaega, o le faailoga lea o Iesu na maliu mo Samoa, ma le tasi, o le faailoga lea o Samoa ua mafai ona tautai.
Le afioga i le tamaitai Palemia, Fiame Dr Naomi Mataafa i sona finagalo i le polokalame o le Fetu Faasinoala i Brisbane i Ausetalia, na pu’eina i Samoa ma lea auaunaga tau faasalalau.
