E ui e le’i oo taumafaiga a le Manu Samoa Taitoafitu a le atunuu i le Ipu autū i le vae i Lonetona ae sa matauina le manaia o a latou taumafaiga i le pulu na taaalo ai mo lea taamilosaga.  

Na sili le Manu Samoa 7s i le Pulu D lea na taaalo ai ma le ‘au a Iapani, Sikotilani faapea ma Egelani. I le taaloga ma Iapani na malosi le finau mai a le ‘au a Samoa ma tulai mai ai i’uga o le taaloga 33-15, sosoo ai ma le taaloga ma le ‘au a Sikotilani o se taaloga mata’ina le finau tele, manumalo Samoa i le 14-12. O le taaloga faai’u o le Pulu D sa feiloai ai Samoa ma le ‘au a Egelani ma manumalo ai foi le ‘au a le atunuu i ‘ai e 28-19. 

Na agai Samoa e taaalo i le Quarter Final ma le ‘au a Sepania ma faamanuiaina ai foi le ‘au a le atunuu i ‘ai e 34-12. Peitai e le’i manuia taumafaiga i le Semi Final lea na feiloai ai ma Ausetalia ina ua malosi le finau mai a lea ‘au taito’afitu ma tulai mai ai ‘ai o le taaloga i le 28 a Ausetalia i le 14 a Samoa. 

E le’i manuia foi taumafaiga a le ‘au a le atunuu i le sailiga o le tualga tolu ma le ‘au a Fiti 31 -26. Ua faatulaga mai ai Samoa i le tualga 4 i le vae i Lonetona, ae ua tulaga 10 i le taamilosaga atoa. 

O le vae o loo loma nei o le a faia i Los Angeles i Amerika i le masina o Aokuso.