E le’i maua lava e leoleo ia latou sa’iliga i tusi saisai, molimau e to’alua ua faia le poloa’iga a le faamasinoga o palota e oo atu e tula’i e molimau mo le tagi tau palota mai le itumalo o Falealili 1.
Ua silia nei i le lima aso talu ona sa’ilia ia molimau e to’alua e le’i maua ma ua faailoa ai ni popolega o le faamasinoga i lo la saogalemu.
Ua faailoa ai foi ma ni lagona o le faamasinoga i le faaono iai o nisi i tua o loo faalavelave i se taumafaiga e taofi ia molimau mai le oo atu i le faamasinoga.
O ia tulaga ua faailoa ai i se pepa o minute mai le Faamasino Sili le avea o le ofisa o le Loia Sili a le malo ma uo a le faamasinoga na te faia se galuega e fesoasoani ai i sa’iliga a leoleo i le fia maua o molimau e to’alua.
Ua taatia ai nei le toe valaauina o le tagi tau palota mai Falealili 1 se’i tālia sa’iliga a leoleo ma faia ai ma le poloa’iga a le faamasinoga e 6 masina ua tuu atu muamua e faia ai sa’iliga a leoleo, ma a lē maua e toe faaopoopo le isi 6 masina se’iloga lava ua maua molimau.
Ua faia ai foi ma le faatonuga e taofia ai le malaga ese ma Samoa o molimau ia e to’alua, ma le faaaliga a le faamasinoga afai e leai se māfua’aga tatau ua lē oo atu ai ia molimau o le a molia loa i le faalēmigao i le faamasinoga poo le contempt of court.
Ua tolopō atu ai nei le toe fofogaina o le tagi tau palota mai Falealili 1 i le Aso Gafua 19 o Ianuari o le tausaga fou 2026, se’i vaganā ua maua molimau o loo sa’ilia a o le’i oo i le aso ua faatulaga e toe fofogaina ai le matāupu.
O le tulaga foi lea i nisi o molimau ua maua tusi samania ae e le’i oo atu i le faamasinoga.
