Saunoa le faauluuluga fou poo le faatonu aoao o le Matagaluega o le Soifua Maloloina i Samoa, le alii polofesa o Aiono Alec Ekeroma i se faatalanoaga ma le Samoa Observer ma lipotia foi e le leitio faavaomalo a Niu Sila, o le a leai se siitaga o totogi o tausi soifua e faia e taofiofi ai i latou i Samoa.
Saunoa Ekeroma e matele lava o le mafuaaga autu o le agai ese mai o tausi soifua ona o le tele o le tupe e mafai ona maua i atunuu i fafo i fuafuaga e pei o galuega faavaitaimi.
E le gata i lea ae e le mafai foi ona faafetauia se ofo mai atunuu e pei o Ausetalia mo se faataitaiga lea e mafai ona galue ai le tausi soifua i aiga ma maua ai se vaegatupe e sili atu nai lo tupe e maua i lo tatou atunuu ma i le mae’a o le tolu tausaga ua mafai ona ave le aiga ma talosaga mo se nofomau.
Fai mai Aiono i le lipoti lea e ui e le o mafai ona faaleleia totogi o tausi soifua i Samoa, ae ao ona silasila i auala e mafai ona taofia ai tausi soifua i le atunuu, ma na ta’ua e Ekeroma e aofia ai ii ma ni faatalanoaga tāua ma taitai o tausi soifua ina ia malamalama ai i mea e ao ona faia.
