Ua mae’a le suesuega faalotoifale a sui e toalima o le komiti ua ta’ua o le Grievance Committee poo le komiti o mataupu ma’ale’ale faalotoifale a le faalapotopotoga o le faaputuga tupe o le lumanai manuia o tagata le SNPF, ma ua lē faamaonia ai tuua’iga na faaseā ai le aufaigaluega sinia o le pulega o lea auaunaga tuma’oti a le Malo, lea sa faatūtū i le Taitaifono o le Komiti Faatonu le susuga Papalii Panoa Tavita Moala.
I lipoti o le taunuuga o lea suesuega ua faailoa ai sa fesiligia ofisa sinia e toafitu o le pulega ua saini suafa i le tusi faaseā ma tuua’iga na ave i le Minisita o Tupe, ae o tali sa latou tuuina atu ua lē mafai ona lagolago ma faamaonia ai tuua’iga uma.
I le faaiuga o suesuega o loo faailoa ai i le lipoti o loo tusia i le gagana peretania,
“All of the allegations made against the chairman were found to be petty and unsubstantiated. For the most part, general statements were made with no direct evidence offered to support the allegations”.
O tuua’iga nei e aofia ai le faatauina o se telefoni feaveai fou o le ituaiga o le S23.
Faaalia i le taunuuga o suesuega a le komiti e leai se pule (authoritry) o le Matagaluega o Faalapotopotoga Tuma’oti a le Malo le MPE (Ministry of Public Enterprises) e faatonu ai le Komiti Faatonu o le SNPF i ia tulaga, ae o le Komiti Faatonu lava a le faalapotopotoga o le SNPF e faia faaiuga e pei ona talia ma faamaonia e le Ofisa Sili le faatauina o le telefoni a le Taitaifono.
O isi tuuaiga o le faatauina o IPads e lua a le Taitaifono ma le tuua’iga ua tele ai tupe faaalu a le faalapotopotoga.
O tuua’iga o le iai o se sootaga (conflict of interest ) o le Taitaifono i le ekalesia na talia le nonogatupe, ma le faatonuina e le Taitaifono o se pisinisi tuma’oti e faia se iloiloga poo se assessment i vaega o le nofoaga o le NPF Plaza na aafia i le mu poo le afi ia Fepuari o le tausaga nei.
O isi tuua’iga o le faatonu e le Taitaifono o tagata faigaluega ma isi lava faaseā e pei o nisi o faila o nonogatupe sa manao iai le Taitaifono a o avea ma Sui Ofisa Sili i le taimi o loo avanoa lea tofiga, ua lē mafai e ofisa sinia e toafitu o le pulega ona tuuina atu ni mau e faamaonia ai.
O loo faailoa i le lipoti o suesuega, e iai se tasi o tagata faigaluega na faamavae o se loia, sa fesoasoani i le tusiaina o le tusi faaseā.
O se gaioiga na lotolotoi ai lea tagata faigaluega a o tautua ai i le faalapotopotoga ae e foliga mai i le silasila a le komiti na feagai ma le suesuega, o le laga’i o lagona ilitata o tagata faigaluega sinia o le pulega na sainia le tusi ma latou tapa lea tagata sa galue muamua mo se fesoasoani i le faiga o le tusi, ua toe maua ai ma le avanoa o lea tagata e lagolago i le gaioiga i le faia o le tusi faaseā.
O le tusi foi o loo faailoa i le mae’a o suesuega ma sailiiliga a le komiti o mataupu ma’ale’ale faalotoifale, sa lē avea i le Ofisa Sili ae momoli sa’o e i latou na faia ma sainia i le Minisita o Tupe.
O le mafuaaga e pei ona faailoa i le faatalanoaina o nisi o le pulega na saini i le tusi, o lo latou manatu o le Ofisa Sili e vavalalata tele sootaga tau galuega ma le Taitaifono.
