Palemia

Leai se isi e alu i le tuuga e faamoemoe e tulaga lua – PM Fiame

O le saunoaga lea a le tamaitai Palemia o le malo tutoatasi o Samoa afioga Fiame Naomi Mataafa i le polokalame o le Malu o le Taeao a le Radio Samoa i le taeao nei ina ua fesiligia i ona lagona ua faamanuiaina le latou taumafaiga ma tulai mai e avea ma uluai Palemia tamaitai.

O le mau a le tamaitai Palemia o le latou lava taumafaiga ma le finau ina ia manumalo mai le fagapalota a le atunuu lea ua tulai mai ai e FAST e taitaia le malo mo le isi 5 tausaga.

O se tasi o vaega taua na faamamafa e le tamaitai Palemia o le tulaga lea o galulue faatasi o Minisita ma o latou Matagaluega eseese ina ia maua le loto gatasi aua o vae ia ma lima e faatinoa galuega a le malo.

“Talu na o’u faipule o le agaga lava lea o le aufaigaluega a le malo o i latou ia e faatino galuega o matou ia o le matou matafaioi e faia tonu ae o latou e faia le galuega tele. E taua la le faia o matou galuega i luga o le fautuaga ma tuualalo a le aufaigaluega ua iai le tomai ma le poto masani”.

O le isi lea galuega na taumafai ai le faigamalo fou ina ia faamautinoa le tumau o le galulue a tagata faigaluega a le malo i lalo o le vaaiga a le malo fou e ui ua tele tausaga o galulue i lalo o le vaaiga a le Malo Tausi.

Taua e Fiame i se tasi o faatalatalanoaga o lea ua amata ona sologa lelei lava faatinoga o a latou galuega ma aufaigaluega ma ua faagasolo ai foi ma a latou polokalame mo le lumanai o Samoa.

Share on facebook
Share on twitter
Share on email
Share on whatsapp

Keep uptodate with Radio Samoa activity & promotion

* indicates required