Ua leai se $27 e fesoasoani i le faatupeina o le pati o le Kerisimasi mo le tagata faigaluega e toatasi.
E silia ma le 6,500 le aufaigaluega a le matagaluega o pisinisi ma galuega i totonu o Niu Sila, ma o i latou nei na faamaonia mai ananafi e le matagaluega ua aveesea lea fesoasoani mo fiafiaga faauma o lenei tausaga, ma ua aloaia foi le faaitiitia o tupe faaalu i le 15%.
O le saunoaga a le Pule Sili o le matagaluega, Carolyn Tremain, ma o se faaiuga ua oo iai ona o le talosaga mai le faigamalo a le Labour e faaitiitia tupe faaalu i le $110 miliona poo le 2%.
I le taimi nei o lea e lei mautinoa le faigamalo, ma e lē o atagia mai i lea suiga isi tupe faasao na muai faailoa mai e le National ma le ACT la te faia pe a manuia mai i le faigāpalota faatoa uma, e faasino lava lea i le matagaluega o pisinisi ma galuega.
Mai le taitai o le National poo ia foi o le Palemia filifilia o Niu Sila, Christopher Luxon, o se fiafiaga le suiga ua faia e le matagaluega e faaitiitia tupe alu, ae i faaiuga o le faia poo le lē faia o ni pati o le Kerisimasi ua fai mai Luxon, e pule lava le Pule Sili o le matagaluega.
