Ua le fiafia le premier o Niu Sau Uelese, Dominic Perrottet ae silisili ai le le fiafia o tagata faigaluega e faamoemoe i nofoaafi poo trains e feoai ai I galuega, ina ua usufai atu mo galuega I le taeao analeila ae leai ma se train o fealuai I le aai. Ua mafua lea tulaga ona e lei maua lava se tonu o feutanaiga I le va o le Iuni, le Rail, Tram and Bus Union ma le faigamalo ale setete e ui e lua fonotaga na faia I luma o le Fair Work Commission ile faaiuga o le vaiaso.
Fai mai le malo o le mafuaaga ua le feoai ai trains e tuuaia ile iuni peitai fai mai le iuni e le o latou e mafua ai ae o le malo. O le faamatalaga a le premier o le setete Dominic Perrottet o loo taua ile ABC ua ia taua ai e lei oo atu sui o le Iuni ile feiloaiga lona lua na fuafua e faia ma ua faaleaogaina ai e le malo auaunaga ia ona o popolega ile saogalemu.
O loo lipotia foi se faamatalaga mai le failautusi a le Iuni o Alex Classens e faapea e le o solo tetee le iuni ma o loo sauni tagata faigaluega e faigaluega peitai o se faamatalaga mai le minisita o Femalagaaiga ale setete, David Elliot na faia ile au faasalalau ua ia faailoa ai o faamatalaga a le iuni e faapea o le malo na tapunia faigamalaga ina ia faamautu ai so latou manatu, oni lapisi ma faatusa ai gaioiga a le iuni o ni faiga faatelolisi.
O leisi itu ua atili ai ona le fiafia le minisita e pei ona faailoa ona ua tupu tonu mai lea faaletonu ile aso ua toe tatala ai tuaoi faavaomalo o le atunuu aemaise o le toe amata o vasega I Iunivesite, ae o tagata aupito sili ona aafia I le mataupu lenei I le aso o nai tagata faigaluega e faalgolago I aso taitasi I auala o femalagaaiga lautele mo galuega e tausia ai aiga.
