Ua mae’a sailiiliga a leoleo ma fomai i le mafuaaga o le maliu o se alii tulisi mai fafo na maua ua maliu i se potu o se fale apitaga tau tagata tafafao i Vailima sa faamautu ai, ma ua faatonuina ai e le pule o maliu le coroner, le tuuina atu loa o le tino maliu o lea tagata i lona aiga mo sauniga masani.
O le mae’a o ia suesuega ma faia le poloaiga a le pule o maliu na tuua ai loa Samoa e nisi o le aiga o lē ua fano le soifua mo le momoliina atu o lona tino maliu.
Ua faailoa e le Komesina o leoleo le tofa Auapaau Logoitino Filipo i le nusipepa o le Samoa Observer o pepa o faamaumauga faafomai mai fafo mo lē ua maliu na faamalieina ai le pule o maliu ma faia lana faaiuga e aunoa ma le faia o se taotoga faapitoa.
O ia pepa o faamaumauga i le talaaga o le soifua maloloina o lē ua maliu o loo faailoa ai aafiaga tau gasegase o loo aafia ai lea tagata.
Na malaga tafafao mai lē ua maliu ma ona mātua i lo tatou atunuu lea o loo faailoa i se lipoti o le aso 23 o Mati na taunuu ai i Samoa ae o le Aso Gafua 25 o Mati na iloa ai ua maliu i le potu o le fale apitaga mo tulisi sa nofo ai.
