Ua faamaonia mai e le Matagaluega o Leoleo ma le Pulega o Tineimu na sologa lelei faamanatuina o le Kerisimasi i le atunuu e aunoa ma ni faalavelave matuia ua uma ai se ola.
O le susuga i le Komesina o Pulega o Tineimu Tanuvasa Perone Mauga i sana faatalatalanoaga ma le Samoa Global na ia faamaonia ai e na’o le afi lea na tulai mai i Vaitele na tali atu iai le tinemu , e leai se ola na maumau i lea faalavelave ma e na’o le pau lea o le valaau na galulue ai i le taimi o le Kerisimasi ma faaiuga o le vaiaso.
Taua e Tanuvasa o le naunautaiga ia tumau ai faapea ma le tausaga fou aua lava le saogalemu o tagata lautele. Na faafetaia ai foi e le Sui Komesina o Leoleo Auapaau Logoitino Filipo le atunuu mo le utagia mai o fautuaga a le Matagaluega.
Faailoa e Auapaau e silia ma le 50 valaau na tali atu iai le Matagaluega ae o le tele o nei valaau o le manaomia o le fesoasoani i tagata ua malosi le faasuavā ae leai ni tulaga matuiā tele.
E ui e leai ni faalavelave tau taavale, faamaonia mai e Auapaau e tasi le faalavelave na tulai mai i Tafatafa na lavea ai i se agaese, na faanatinati atu lea tina i le falemai i Poutasi ma oo atu ai i le falemai tele Motootua ma o loo faasolosolo manuia.
