E le’i fia talanoa le Fofoga o le maota i fesili na fesiligia ai ia i le mataupu na faia ai trespass notices. 

I luma o le komiti filifilia ananafi e talanoaina ai le paketi a le Palemene o lenei tausaga, na faaaogā ai e faipule le avanoa e tu’ifesili ai Trevor Mallard ma ana faai’uga i le tetee i tui e pei ona logologoa ai ia Fepuari. 

O se tasi o fesili o loo taulai lea i le faai’uga na ave ai trespass notice ia Winston Peters faapea nisi o sui sa avea ma faipule. 

I se tali a le Fofoga Fetalai na ia teena lona faia to’atasia o ia faai’uga ma e lē toe oo iai sana saunoaga. 

O le lē fia tali mai ai o Mallard na lē fiafia ai ma le to’atele o sui faipule o itu agai. 

Ua toe lagona ai ma leo o le National faapea le ACT ua tatau ona faamavae Mallard mai ona tofiga. 

Ua faatalosagaina ai foi e sui o ia pati le Palemia Jacinda Ardern e fai le mea tonu ma faamuta auaunaga a le Fofoga Fetalai o loo iai nei. 

I se tali a le Palemia, foliga mai o loo iai pea lava lana lagolago ia Mallard.