O totonu o le taulaga faatau i Otara sa faatinoina ai se galuega faa-Samaria agalelei a se tasi o mafutaga ua ta’ua o le Mother of Divine Mercy e ala i le fafagaina o le mamalu o le atunuu, tufatufa atu nisi o pusa meaai faapea ma le faasoaina o nisi o oloa auā le fesoasoani i nisi o aiga o loo fia maua le fesoasoani. 

O le polokalame o le Aso Sa, aso 21 Aperila, faatoa tatala le avanoa mo meaai i le ta o le tasi i le aoauli, peitai e lei tāina le 12 i le aoauli ua leai se ofi o totonu o lea nofoaga i le mamalu o le atunuu i tagata matutua e oo lava i fanau ua agai atu se’i tali lea faamanuiaga ua sasaa mai. 

O le tumutumu ai o tagata i lea aso ua lē mafai ai foi ona taofiofi le lolofi atu i autafa o laulau ma tauanau le au galulue a le Mother of Divine Mercy ua tatau ona amata loa ona fai meaai. 

Ma o lea sa tatalaina ai loa le laina o meaai a o lei taitai tāina le 1 i le aoauli. 

Na vaaia le toatele o tagata sa auai ae lei taitai ai le tele o meaai sa tapenaina e le mafutaga, e oo lava i pusa meaai ma nisi o oloa sa faasoasoa fua mo le lautele o tagata lea sa iloga ona tofusia uma ai le mamalu o le atunuu. 

O le auaunaga a le South Seas Healthcare na latou tapenaina faleie e faamalumalu ai le atunuu ma tali a latou sua. 

O le auaunaga a le Mother of Divine Mercy o loo i Avondale, e tai lua vaiaso i le masina ma faagasolo le latou polokalame i totonu o Aukilani ina ia faatofutofusia uma ai le mamalu o le atunuu. 

E lē o iai se lagona o lea auaunaga e faailoa le latou galuega faa-Samaria, ae pau le lagona ia i latou o le auauna ma le loto maulalo mo tagata lautele auā sa latou tautua mo le atunuu ina ia maualuga ai le viiga o le Atua.