Ua tauaau ina uma le pusa onosai o le minisita o femalaiga’iga i le tuai ona maua o se tonu i vaa o loo femalaga’i ai tagata Waiheke. 

O le mataupu lenei ua leva ona faatalosaga e tagata o loo nonofo i Waiheke e aumaia le vaaiga o vaa feoa’i i le sami o loo faaaogā e Waiheke lea o loo pulea to’atasi e le Fullers i lalo o le pulega a le Auckland Transport. 

O se faatagana ua silia ma le 10 tausaga. 

Ua toe lāgā ai i le mae’a sau o tau a le Fullers o le a sii tau o faigamalaga lea o le a $46 i le alu ma le sau, suia mai ai mai le $42 o loo iai nei, tusa lea ma le $403 i le masina. 

Ae o le fiafia ai le toatele, mai le Fullers o le siitaga muamua lenei o pasese talu mai le taimi a o le’i sau le Koviti ma ua faia ai ona o le taugata o le suauu, inisiua ma isi. 

I tala a le leitio a Niu Sila o loo faaauau pea talanoaga ma feutana’iga e aveesea mai ai le malosiaga o loo umia e Fullers e mafai ai ona ia pulea to’atasi e aunoa ma le sau i lalo o faamalumaluga a le Auckland Transport, ma a o alu nei fonotaga ua faaalia e le minisita ia Michael Wood lona lē fiafia. 

Saunoa Wood, ua lava lea o le a aga’i loa le malo e faia se suiga lelei mo tagata Waiheke, ma o talanoaga o loo faia i le va o le Auckland Transport ma le pulega a le Waka Kotahi o le a faatali iai, ma a mae’a loa o le a faatonuina loa le Council e aveesea mai le faatagana faapitoa e lē o pulea ai e le Auckland Transport vaa feoa’i i Devonport ma Waiheke.