O loo iai le faamoemoe o le Palemia o le Atu Kuki, Mark Brown, e iai le avanoa e talanoa ai i le faigamalo a Niu Sila e faaleleia nisi o vaega sa faalēlelei mai le latou itu. 

Ua toe taliu ane Brown i Avarua i le Atu Kuki i le mae’a o lana malaga i Saina lea sa sainia ai ma le Comprehensive Strategic Partnership e faamalosia ai le sootaga poo le mafutaga ma Saina.

A o le’i sainia lea maliega na ia ta’ua ai e leai se mana’oga mo Niu Sila e iai i lea fonotaga mo latou, sa faia lana faamatalaga lea i le mae’a ona laga nisi o popolega mai le matagaluega o le va i fafo a Niu Sila e tusa o lea feiloa’iga.

O le faamatalaga la a Brown sa fai i le autusitala ina ua mae’a sainia le maliega ma Saina ua ia ta’ua ai, e le’i feiloa’i ma le faigamalo a Niu Sila ae o loo faamoemoe e iai se taimi e maua ai se avanoa e talanoa ai.

Fai mai le Palemia e lē o toe mamao ona faailoa auiliili mai lea o le maliega ua sainia ma Saina ma na te talitonu afai e silasila le malo o Niu Sila i le maliega ua sainia o le a leai se vaega e faapopoleina ai fua i latou.

Na toe foi ane le Palemia i lona atunuu i le tele o faitioga ma manatu faaalia i le maliega e pei ona feta’ua’ina, o loo ta’ua i lipoti a le RNZ sa manana’o le faigamalo a Niu Sila e silasila i aiaiga o le maliega lea a o le’i sainia peitai e le’i tupu lea tulaga.

Puna o Faamatalaga: https://www.rnz.co.nz/international/pacific-news/542137/no-areas-of-concern-cook-islands-pm-returns-home-addresses-nz-s-china-deal-fears