Ua faamaonia mai e le minisita o loo feagai ma le mata’ituina o le Koviti-19, Ayesha Verrall o le a lē toe apiliina e le malo le faai’uga a le faamasinoga i le mataupu e aofia ai le kulupu ua faaigoaina o le Grounded Kiwis. 

I le masina o Aperila na malo ai le Grounded Kiwis i le latou mataupu na ave i le faamasinoga maualuga e faatatau i le faatonutonuina o tuaoi o le atunuu i se vaega o le taimi o loo tetele le faama’i ma ua oo ai i se tulaga ua aafia ai ma le aiātatau o le toe foi mai o le tagata Niu Sila i le atunuu. 

Ua faailoa la e le minisita ua faia le faai’uga e lē toe apiliina le mataupu i le mae’a ona maua o fautuaga faaletulafono. Ina ua fesiligia e le televise tasi pe o le a faia sa latou faatoesega i tagata na aafia, na ta’ua ai e Verrall e na te iloa sa fai si faigata o le MIQ process mo tagata peitai o se mea sa tatau ona fai ina ia saogalemu ai le atunuu. 

Fai mai le ta’ita’i o le ACT, David Seymour o le faai’uga a le malo ia aua ne’i faia se apili o se ta’utinoga lava foi lea a le malo i lo latou sese.