E to’atolu ni alii ua faasaoina mai ola ina ua goto ifo la latou vaa fagota i le sami i faaitu o Tolaga Bay.
Faamauina i lipoti mai le leitio faavaomalo a Niu Sila na ta’ua ai e oo tau lelei i le 6 itula o faaopeopea nei alii i le sami, ma e faapea na māfua ona goto lea vaa fagota ona ua lāvea ma mamau le mailei e faaaogā mo le fagotaina o le ula sami – craypot line ma le vaa fagota.
Ta’ua na maua atu e le ‘au lavea’i o faaopeopea i latou o loo faaaogāina se ofu faaola, o se paelo ma se apa e utu ai totonu le penisini.
Māua, lo latou vaivai tele i le taimi na maua atu ai i latou, ma e faaalia foi le tulaga mata’utia ua oo iai lo latou tino – mālūlūina tele poo le vaega ua ta’ua o le hypothermia talu ai le umi na iai i totonu o le sami; o le tasi o i latou na avatu i le falema’i mo togafitiga – e le’i faapea na iai i se tulaga tigaina.
I lipoti na ta’ua ai le to’atele o sui o faavalelave tutupu faafuase’i na tali atu i lenei matāupu, e pei ona galulue faatasi ai sui o le Coastguard, o leoleo, o vaega lavea’i a le Rescue Coordination Centre, o le vaega o puipuiga – Defence Force, o le vaega a le Surf Lifesaving; sa faaaogāina foi vaalele o helikopa, ma le fesoasoani a tagatānuu o faaitu o Tolaga.
Faaalia e le vaega a le Coastguard, ua matua’i laki lava le sao mai o ia alii, o lana faafetai o le mafai ona faasaoina mai ola, ma e faafetaia ai foi le galuega fītā sa feagai ma sui na omai faatasi e sa’ili ma lavea’i ola o i latou nei.
Puna o Faamatalaga: https://www.rnz.co.nz/news/national/584054/men-found-clinging-to-life-jacket-bucket-and-petrol-can-after-boat-capsizes
