O le tamaitai o Bethsharon Mattocks mai le Tausaga 9 a le Kolisi a Tangaroa, o se tamaitai palagi o ona tupuaga e mai Uelese, Egelani, Sikotilagi ma Siamani, e leai sona toto Samoa, ae na ia matuā faaofo le aofia na maimoa ma faalogologo i lauga faasamoa o loo faia i le Polyfest, ina ua tulai Beth ma fai lana lauga faasamoa, i le uluai aso o le tauvaga o tautalaga.

E tele vaega tāua sa ta’ua e Beth ua fiafia ai e a’oa’oina le gagana Samoa a o soifua ane ai i Aotearoa, nai lo le a’oa’oina o gagana o tupuaga a ona mātua.

Na ia ta’ua, o lona a’oa’oina o se isi gagana e ese mai lana gagana Peretania, ua faaleleia ai lona mafaufau ma ola lelei ai lona fai’ai ma tatala ai lona malamalama i mea na te lei iloa muamua.

Sa ta’ua e Beth e tusa ai ma suesuega a tagata atamamai i gagana, ua molimau ai, o le tagata e tele atu nisi gagana e tautala ma malamalama ai, e tele foi avanoa e maua ai ni galuega, e sili ona lelei i le lumanai ma mafai ai ona fesootai lelei ma isi tagata.

Na ta’ua e Beth, e toatele tagata Samoa latou te lolotu faatasi, e toatele tamaiti Samoa latou te aooga faatasi, ma e toatele foi tagata Samoa i lo latou pitonuu, o le ala lea ua ia filifili ai e tatau ona ia a’oa’oina le gagana Samoa, ina ia mafai ai ona ia fesootai lelei atu i tagata Samoa, ma ia faaaloalo ai foi i la latou gagana Samoa, ma latou malamalama ai foi ia te ia.

Ma ua tatau ai la ona ia a’oa’oina le gagana Samoa, ina ia mafai ona sologa lelei ana fesootaiga ma tagata Samoa lea o loo tele ina latou faifaimea faatasi, se’i alu foi i atunuu o ona tupuaga ona faatoa a’oa’o lea o a latou gagana.

Fai mai Beth, e fiafia foi e faitau le Tusi Paia faasamoa, ma e toatele ana uo Samoa e fesoasoani ane e a’o lana siva Samoa, ma fiafia foi i meaai Samoa, ma e na te mautinoa o le gagana Samoa o loo iai le alofa.

O le tulai o lenei tamaitai palagi e faaleo mai se tautalaga i le gagana Samoa, ua avea o se lu’itau mo fanau Samoa ina ia finau foi latou e a’oa’oina, tautala ma malamalama i la latou lava gagana.

O se vaaiga uigaese lea i tauvaga lauga a le fanau i lenei tausaga i le Polyfest, ona ua mafai ona tulai ai se tamaitiiti mai se isi tupuaga ma ese lana uluai gagana ae ua fiafia e fai sana tautalaga i le gagana Samoa.

O loo toe faauau i le aso lona lua lenei le tauvaga o tautalaga a fanau aoga, ma o le aso a taeao, Aso Faraile ma le Aso Toonai o le a faagasolo ai tauvaga o siva mauluulu ma isi faafiafiaga, ma taulauga ai loa i le Aso Toonai e lau ai togi.