O le taeao nei na faatino ai le faauuga o alo ma fanau a le atunuu o loo aoaoina i le Iunivesite Aoao o Samoa.
O lenei au faauu e lata i le to’a 200 aofia ai ma le afioga i le Minisita o Aoga Taaloga ma Aganuu le susuga Seuula Ioane na maua faailoga ma tusipasi. Ua 64 tausaga o le soifua a le alii Minisita ma o ia foi o se faiaoga ua tele tausaga o tautua i lea tomai mo le aoaoina o fanau lalovaoa a le atunuu.
O lea faauuga na saunoa ai foi ma le taitai o le malo le tamaitai Palemia Fiame Naomi Mataafa i le saunoaga autu, o lana lea uluai saunoaga i le tofiga Palemia i se faauuga a le Iunivesite talu ona filifilia le faigamalo fou.
Taua e Fiame “O le fuaitau e masani ona faamanatu i taimi o faauuga e faapea e lē na’o le taunuuga e taua e taua foi le faigamalaga. E lē maua gofie le aso lenei pe ana leai le savaliga umi sa outou uia mai, e taua le aso lenei e taua foi laasaga sa savalia. E le galo le fesoasoani ma uo ma aumea mamae sa asoa faatasi le avega”
Ma faamanatu foi e le tamaitai Palemia i le au faauu le taua o le tuualalo a alii ma tamaitai faiaoga ae faapea tapuaiga a aiga ua tini tau lau ai le faamoemoe.
O le au faauu ua aofia ai ma nisi o alo ma fanau ua maua tusipasi i le maea o le vasega amata o aoaoga faaiunivesite ma ua sauni i le sailia o faailoga maualuluga i tomai ma agavaa eseese.
O le faauuga lenei sa faatulaga e faia i le Aso Faraile na tea nei peitai ona o aso e lua na atofa mo le tūiga tele a le atunuu mo le faama’i o le Koviti19 na tapunia ai galuega ma aoga uma i Samoa o le mafuaaga lea o le toe tolopo mai i le asō.
